शिडवणे नं. १ शाळेत 'ज्ञानकुंज' मासिकाचा दुसरा अंक प्रकाशित, मान्यवरांची मांदियाळी!

 

---

शिडवणे नं. १ शाळेत 'ज्ञानकुंज' मासिकाचा दुसरा अंक प्रकाशित, मान्यवरांची मांदियाळी!

मोफत छत्री वाटपाबरोबरच विद्यार्थ्यांना ज्ञानाची भेट

शिडवणे, ३० जुलै २०२५: शिडवणे नं. १ शाळेमध्ये आज एक दुहेरी आनंदाचा सोहळा पार पडला. कै. प्रवीणचंद्र शहा यांच्या स्मरणार्थ मोफत छत्री वाटप समारंभासोबतच शाळेच्या 'ज्ञानकुंज' या मासिकाच्या दुसऱ्या अंकाचे मान्यवरांच्या शुभहस्ते प्रकाशन करण्यात आले. माहे जुलै २०२५ साठीचा हा अंक, विद्यार्थ्यांच्या सर्जनशीलतेला व्यासपीठ उपलब्ध करून देणारा ठरला आहे.

शिडवणे गावठणवाडी उत्कर्ष मंडळ, शिडवणे यांच्या वतीने कै. प्रवीणचंद्र शहा यांच्या पत्नी हंसा प्रवीणचंद्र शहा व चिरंजीव मितेश प्रवीणचंद्र शहा यांच्या आर्थिक सहकार्याने आयोजित केलेल्या या कार्यक्रमामुळे शाळेत उत्साहाचे वातावरण होते.

या महत्त्वाच्या क्षणी अनेक मान्यवर उपस्थित होते. राष्ट्रपती पोलीस पदक प्राप्त निवृत्त पोलीस अधिकारी विजय टक्के, शिडवणे गावठणवाडी उत्कर्ष मंडळाचे वाडीप्रमुख सदाशिव कुडतरकर, मुंबईस्थित सदस्य मंगेश शेट्ये व विजय शेट्ये, ग्रामपंचायत सदस्य दयानंद कुडतरकर व संतोष टक्के, शाळा व्यवस्थापन समितीचे अध्यक्ष दिनेश रांबाडे व उपाध्यक्षा संचिता टक्के, शिडवणे आरोग्य मंदिर अधिकारी प्रणव पाटील, तसेच आरोग्य सेवक गणेश तेली, अरविंद धाक्रस, उर्मिला सुतार, सायली सुतार, जान्हवी टक्के, निशा कुडतरकर, प्रेरणा कासार्डेकर, तारीफ शेख, समीक्षा सुतार, वैभव पाटणकर, विराज शेट्ये हे या प्रकाशन सोहळ्याचे साक्षीदार ठरले.

या प्रसंगी अंगणवाडी सेविका प्रियांका पाटणकर, मदतनीस कविता केतकर, शालेय पोषण आहार स्वयंपाकी समिता सुतार, शिडवणे कोनेवाडी अंगणवाडी सेविका शालिनी शिर्सेकर, समाधान पाटणकर, कृषीदूत राहुल पळसकर, निशांत माने, तेजस येडगे, पृथ्वीराज नरके, अभंग सलगर, दिग्विजय संकपाळ, दिग्विजय जांभळकर, हृतेश यादव यांचीही उपस्थिती होती.

शाळेचे मुख्याध्यापक प्रवीण कुबल, उपमुख्याध्यापिका सीमा वरुणकर, पदवीधर शिक्षिका हेमा वंजारी आणि क्रीडा शिक्षक सुरेंद्र यादव यांनी या कार्यक्रमाचे यशस्वी आयोजन केले. उपस्थित मान्यवरांच्या हस्ते 'ज्ञानकुंज' मासिकाच्या दुसऱ्या अंकाचे प्रकाशन करण्यात आले. या अंकात विद्यार्थ्यांचे लेख, कविता आणि विविध कलाकृतींचा समावेश आहे, ज्यामुळे त्यांच्या सुप्त गुणांना वाव मिळत आहे.

मुख्याध्यापक प्रवीण कुबल यांनी शिडवणे गावठणवाडी उत्कर्ष मंडळाने विद्यार्थ्यांच्या शैक्षणिक उठावासाठी आणि अशा रचनात्मक उपक्रमांना दिलेल्या पाठिंब्याबद्दल कृतज्ञता व्यक्त केली. 'ज्ञानकुंज' मासिकाच्या माध्यमातून विद्यार्थ्यांमध्ये वाचन आणि लेखन संस्कृती रुजेल, अशी आशा त्यांनी व्यक्त केली.