🔴 देशसेवेतील 'राखी'चे नाते: ७३ बटालियनला पाठवलेल्या राख्यांनी जवानांचे मनगट सजले

🔴 देशसेवेतील 'राखी'चे नाते: ७३ बटालियनला पाठवलेल्या राख्यांनी जवानांचे मनगट सजले

शिडवणे : रक्षाबंधनाचा पवित्र सण देशाच्या सीमेवर तैनात असलेल्या जवानांसाठीही आनंदाचा क्षण ठरला. यंदा कणकवली तालुक्यातील शिडवणे क्रमांक-१ येथील जिल्हा परिषद प्राथमिक शाळेतील विद्यार्थिनींनी ७३ बटालियन, केंद्रीय राखीव पोलीस दलाच्या जवानांसाठी खास राख्या पाठवल्या. या राख्या मिळाल्यानंतर बटालियनमधील सर्व जवानांनी मोठा आनंद व्यक्त करत मुलींच्या या अनोख्या उपक्रमाचे कौतुक केले आहे.

🔹 मुलींचे प्रेम आणि आपुलकी:

          रक्षाबंधनाच्या शुभ मुहूर्तावर या शाळेच्या मुख्याध्यापकांनी पुढाकार घेऊन विद्यार्थिनींच्या मदतीने तयार केलेल्या राख्या जवानांसाठी पाठवल्या होत्या. या राख्या ७३ बटालियनचे कमांडंट के. कुमार यांना मिळाल्या. त्यांनी या राख्यांचे कौतुक करत या उपक्रमाबद्दल कृतज्ञता व्यक्त केली. 'मुलींनी पाठवलेल्या राख्यांनी आमच्या सर्व जवानांचे मनगट सजले. या राख्या केवळ धागे नसून, आमच्या बहिणींच्या प्रेमाचे आणि विश्वासाचे प्रतीक आहेत,' असे कमांडंट के. कुमार यांनी सांगितले.

🔸जवानांचे आभारपत्र:

         या उपक्रमामुळे बटालियनमधील सर्व जवान भारावून गेले आहेत. याबद्दल त्यांनी जिल्हा परिषद प्राथमिक शाळा, शिडवणे-१ येथील सर्व विद्यार्थिनी आणि शिक्षकांचे आभार मानले. कमांडंट के. कुमार यांनी विशेषतः शाळेला उद्देशून एक आभारपत्र पाठवले आहे. या पत्रात त्यांनी लिहिले आहे की, 'तुमच्या या प्रेमाने आमचे मनोबल वाढले आहे. आम्ही सर्वजण अदम्य साहस आणि उत्साहाने देशसेवेत सदैव तत्पर राहू.'

         शिडवणे नं. १ शाळेच्या या उपक्रमामुळे नागरिक आणि जवान यांच्यातील संबंध अधिक दृढ झाले असून, देशभरातील नागरिक आपल्या सुरक्षिततेसाठी सीमेवर लढणाऱ्या जवानांना आपले मानतात, हे पुन्हा एकदा सिद्ध झाले आहे.